مەودا میدیا-
 
ئەمڕۆ چوار شەممە 2025/7/16، ئەنجومەنی سەرکردایەتی یەکێتیی نیشتمانیی کوردستان بە سەرپەرشتی بافڵ جەلال تاڵەبانی ، سەرۆکی یەکێتیی نیشتمانیی کوردستان  لە سلێمانی کۆبووەوەو راگەیەندراوێکی بڵاوکردەوە.

ئەنجومەنی سەرکردایەتی یەکێتیی نیشتمانیی کوردستان رایگەیاند "کۆبوونەوە تەرخانکرا بۆ گفتوگۆکردن لەسەر دواپێشهاتەکانی پرسی مووچە و گوزەرانی هاوڵاتیانی هەرێمی کوردستان و دیاردەی دزێوی پەلاماردانی شوێنە جیاجیاکانی  کوردستان بە درۆن و بە ئامانجگرتنی دامەزراوە ئابوورییەکان".

ئاماژەی بۆ ئەوەشکرد "سەرکردایەتی یەکێتی بە تووندی ئیدانەی ئەو جۆرە رەفتارە دوژمنکارانەی کرد کە مەرام لێی زیان گەیاندنە بە ئاسایش و ئارامی و ئابووری وڵاتەکەمان و گوشارخستنە سەر قەوارەی هەرێم".

ئەوەشی خستەڕوو "پێویستە حکومەتی فیدڕاڵ بەرپرسیارێتی نیشتمانیی و فەرمی و دەستووریی خۆی راپەڕێنێت بەرانبەر ئاسایشی هاوڵاتیانی کوردستان و ئەوانەی هەڵدەستن بەو تاوان و پێشێلکاریانە رووبەڕووی دادگایان بکەنەوە و رێگا نەدەن درزی ئەمنی قووڵ بێتەوە".

باسی لەوەشکرد "ئەنجومەنی سەرکردایەتی گفتوگۆیکرد لەسەر دۆخی هەستیار و خراپی  ژیان و گوزەرانی کۆمەڵانی خەڵک،  بە تایبەت پێویستی رێککەوتن لەگەڵ بەغدا و دابینکردنی مووچەی فەرمانبەران و بوژاندنەوەی بازاڕ و ئاوەدانی".

ب ح