مەودا میدیا-

بە بڕیاری ئەنجوومەنی وەزیرانی عیراق، بڕەپارەیەك بۆ وەزارەتی ناوخۆ تەرخانکراوە بەمەبەستی دروستکردنی خاڵی سنووریی لە نێوان هەرێمی کوردستان و ئێران.

لە راگەیەندراوێکی نووسینگەی راگەیاندنی ئەنجوومەنی وەزیرانی عیراق كە وێنەیەكی دەست مەودا میدیا گەیشتووە هاتووە، ئەنجوومەنی وەزیران بڕیاریداوە بە هەموارکردنەوەی بڕیاری ژمارە 216ی ساڵی 2022، بەمەبەستی دروستكردنی خاڵی سنووریی لەنێوان سنوورەكانی عیراق - ئێران كە خاڵە سنوورییەكان دەكەونە سنووری نێوان هەرێم - ئێران.

بەپێی ئەو بڕیارە، بڕی 10 ملیار دینار بۆ وەزارەتی ناوخۆ تەرخانکرابوو، بەمەبەستی دروستکردنی خاڵی سنووری لەنێوان عیراق - ئێران، لەسەر سنوورەكانی کوردستان.

ئاماژە بەوەشكراوە، دانانی ئەو خاڵە سنوورییانە بەمەبەستی رێگریکردنە لە دزەپێکردن و قاچاخچییەتی و كاری هاوشێوە، خاڵە سنوورییەكانیش لە سنووری عیراق-ئێران لە چوارچێوەی خاكی هەرێم دەستپێدەكەن و لە سنووری تورکیا تەواودەبن.

باس لەوەشكراوە، دروستكردنی ئەو خاڵە سنوورییانە بەپێی بڕیارەكە دوای پەسندکردنی بودجەی گشتی فیدراڵی دەچێتە بواری جێبەجێكردن.

ژ.ع