مەودا میدیا-

وەزارەتی تەندروستیی عیراق لەبارەی ئامارەكانی تووشبوون بە ڤایرۆسی كۆڤید ئێریس روونكردنەوەیەكی بڵاوكردەوە و رایگەیاند، لە وڵاتەكەدا هیچ تووشبوویەك تا ئێستا تۆمارنەكراوە.

ئەمڕۆ سێشەممە 22ی ئاب-2023، سەیف بەدر، وتەبێژی وەزارەتی تەندروستیی عیراق رایگەیاند، هەتا ئێستا لە سەرتاسەری وڵاتەكەدا هیچ تووشبوویەكی ڤایرۆسە نوێیەكی كۆرۆنا كە بە ئێریس ناسراوە، تۆمارنەكراوە.

لەمیانی لێدوانێكی رۆژنامەنووسییشدا بەدر جەختیكردەوە، دروستبوونی ڤایرۆسی نوێ و گەشەسەندووی جیاوازی كۆرۆنا شتێكی ئاساییە، وەزارەتەكەشیان هۆشداریی دەدەن لەوەی ڤایرۆسە نوێیەكانی كۆرۆنا ئەگەری هەیە زیاتر مەترسییان هەبێت و ئەگەریش هەیە كەمتر لە كۆڤید مەترسیداربن.

ئاماژەی بەوەشكرد، عیراق هەتا ئێستا هیچ حاڵەتێكی تووشبوونی تێدانییە، بەڵام لە وڵاتانی جیهان هەیە و دەكرێت لەناو توێژی بەتەمەنان، تووشبووانی نەخۆشییە درێژخایەنەكان یان ئەوانەی بەرگریی جەستەیان لاوازە ڤایرۆسەكە زیاتر بڵاوبێتەوە.

روونیشیكردەوە، رێگەكانی خۆپاراستن هاوشێوەی كۆڤید-19 دەبێت دەستەكان بە پاكژی رابگیردرێن، دەمامك بەكاربهێندرێت و مەودای نێوان مرۆڤەكان كەمتر نەبێت لە یەك مەتر.

ژ.ع