مەودا میدیا-

ئەندامێکی مەکتەبی سیاسی یەکێتیی نیشتمانیی کوردستان ئاشکرایکرد یەکێتی و پارتی هاوڕان لەسەر کاراکردنەوەی پەرلەمانی کوردستان و ئەم هەنگاوەش هەرێم لە دۆخی چەقبەستوویی رزگار دەکات و کارانەبوونی پەرلەمانیش زۆر لەسەر هەرێمی کوردستان دەکەوێت.

سەعدی ئەحمەد پیرە، ئەندامی مەکتەبی سیاسی یەکێتیی نیشتمانیی کوردستان رایگەیاند "کاراکردنەوەی پەرلەمانی کوردستان هەنگاوێکی گرنگە و متمانەی خەڵک و دۆستەکان بە هەرێمی کوردستان زیاتر دەکات و دەبێتە هەنگاوێکی باش بۆ پێکهێنانی حکومەت".

ئاماژەی بۆ ئەوەشکرد "لە خولەکانی پێشوو پەرلەمانی بۆ ماوەیەک سەرۆکی نەبووەو پەرلەمانتارێک بەشێوەی کاتی راسپێردراوە تاوەکو بە فەرمی سەرۆکی پەرلەمان دیاری دەکرێت و کابینەی نوێی حکومەت پێکدێت".

ئەوەشی خستەڕوو "هیچ لایەنێک زۆرینەی بەدەستنەهێناوە بۆ پێکهێنانی کابینەی نوێێ حکومەت، یەکێتیش بەرنامەی خۆی هەیە بۆ حکومەت و دەیەوێت دابەشکردنی پۆستەکان بەشێوەی شەراکەتی راستەقینە بێت نەک موشارک، بۆیە یەکێتی فەرمانڕەوایی  یەکلایەنە رەتدەکاتەوە".

باسی لەوەشکرد "ئەگەر لایەنێک بیەوێت هەموو پۆستە باڵا و ئەمنییەکان لای خۆی بێت ئەوە خوازیاری هاوبەشی نییە بەڵام بەشێوەیەکی گشتیی یەکێتی و پارتی یەکتریان قبوڵە".

وتیشی "کێشەکانی نێوان هەرێم و بەغدا زیاتر سیاسین و زیاتر بۆ نەبوونی متمانە لەنێوان هەردوولا دەگەڕێتەوە، بەڵام دەبێت بەپێی ئیرادەی خەڵکی کوردستان بیربکەنەوەو لەپێناو مووچەی خەڵک رێێکەوتن بکەن نەک بەرژەوەندی کۆمپانیاکان، بۆیە دەبێت کێشەی کۆمپانیاکانی نەوت و داهاتی ناخۆ چارەسەر بکرێت".

ب ح