مەودا میدیا-

بەڕێوەبەرایەتیی رۆشنبیریی و هونەری هەڵەبجە ساڵانە بە چەندین چالاکی جۆراوجۆر پێشوازیی لە هاتنی ساڵی نوێ دەکات، بەڵام بۆ ئەمساڵ هیچ ئامادەکارییەکی نەکردووە و بەڕێوەبەری بەڕێوەبەرایەتییەکەش هۆکارەکەی رووندەکاتەوە.

سەرخێڵ غەفار، بەڕێوەبەری بەڕێوەبەرایەتیی گشتیی رۆشنبیریی و هونەر لە هەڵەبجە بە مەودا میدیای راگەیاند "بە دوو هۆکاریی سەرەکی بۆ سەری ساڵی 2025، ئامادەکارییان نەکردووە و هیچ چالاکییەک لە شارەکە ئەنجام نادەن".

ئاماژەی بۆ ئەوەشکرد "بەهۆی قەیرانی دارایی و نەبوونی بودجەی پێویست ناتوانن هیچ چالاکییەکی هونەری یان ئاهەنگێک لە سنووری پارێزگای هەڵەبجە ساز بکەن".

ئەوەشی خستەڕوو "دۆخی رۆژئاوای کوردستان یەکێکی ترە لە هۆکارەکان کە بەهۆی پەلاماریی سوپای تورکیا و گرووپە چەکدارەکان بۆ سەر ئەو بەشەی نیشتمان و شەهیدبوونی هاونیشتمانیان ، وەک رێزێک بۆ قوربانییەکان و خانەوادەکانیان ناتوانن هیچ ئاهەنگ و بۆنەیەک بۆ سەری ساڵ رێکبخەن".

ئەمە لە کاتێکدایە، بەڕێوەبەرایەتییەکانی رۆشنبیریی و هونەر ساڵانە بە چەندین چالاکی هونەری جیاواز لە پارێزگاکانی هەرێمی کوردستان پێشوازیی لە هاتنی ساڵی نوێ دەکەن، بەڵام تاوەکو ئێستا لەلایەن شارەوانییەکان و بەڕێوەبەرایەتییەکانی رۆشنبیریی وەک پێویست ئامادەکاریی بۆ ساڵی نوێ نەکراوە.

ب ح