مه‌ودا میدیا-

لێپرسراوى راگەیاندنی كارەبای سلێمانی ئاماژه‌ به‌وه‌ده‌كات "لە ئێستادا پێدانى كاتژمێره‌كانى كاره‌با به‌ هاوڵاتییان زۆر كه‌مه‌ و هه‌ر ئه‌وه‌نده‌ توانایان هه‌یه‌ و بۆ سه‌ری ساڵیش كاتژمێره‌كانى پێدانى كاره‌با زیاد ناكات".

سیروان محەمەد، لێپرسراوى راگەیاندنی به‌ڕێوه‌به‌رایه‌تیی گشتیی كارەبای سلێمانی ئاشكرایكردووه‌ "پێدانى كاتژمێره‌كانى كاره‌باى نیشتمانیی به‌ هاوڵاتییان له‌ ئێستادا رۆژانە ته‌نیا شه‌ش بۆ حه‌وت كاتژمێره‌ هه‌ر ئەو بڕە بەرهەمەی کارەبایان له‌ توانادایه‌".

سه‌باره‌ت به‌ زیادكردنى كاره‌با به‌ هاوڵاتییان له‌ رۆژانى سه‌ری ساڵدا روونیشیكرده‌وه‌ "هه‌ر وه‌ك ئێستا ده‌بێت و رۆژانه‌ له‌و چه‌ند كاتژمێره‌ى كاره‌با زیاتر نادرێت به‌ هاوڵاتییان".

له‌ ئێستادا به‌هۆى هاتنى وه‌رزى سه‌رماوه‌ خواست له‌ سه‌ر به‌كارهێنانى كاره‌با له‌ لایه‌ن هاوڵاتییانه‌وه‌ به‌ هۆى پێداویستى زیاتره‌وه‌ زیادى كردووه‌ و هه‌موو ساڵێكیش له‌م كاتانه‌دا كێشه‌ى كه‌مى كاره‌با رووبه‌ڕوه‌ى هاوڵاتییان ده‌بێته‌وه‌.

پ ح ع