مەودا میدیا- سەركۆ جەمال

لە پاریسی پایتەختی فەرەنسا و لەنزیك بارەگای پێشووی گۆڤاری شارلی هیبدۆ 10 كەس بە چەقۆ برینداركران، پێشتریش لەو شوێنە چەندین رووداوی هاوشێوە روویداوە و ساڵی 2015 ش بەهۆی بڵاوكردنەوەی كاریكاتێری پێغەمبەری ئیسلام هێرشكرایە سەر گۆڤارەكە.

جان كاستێكس، سەرۆك وەزیرانی فەرەنسا لە تویتێكدا "هێرشەكەی پشتڕاستكردەوە و رایگەیاند راستەوخۆ چووەتە بارەگای وەزارەتی ناوخۆ بۆ لێكۆڵینەوە لە هێرشەكە".

بەپێی هەواڵی میدیاكانی فەرەنسا و جیهان، پیاوێك بە ساتورێكەوە هێرشیكردووەتە سەر ژمارەیەك هاوڵاتی لە شەقامی "ریچار لونوار" لە ناوچەی 11 ی پاریس، بەهۆیەوە 10 كەس برینداربوون و دوو كەسیان برینەكانیان سەختە.

دوای رووداوەكە پۆلیس گەمارۆی ناوچەكەی داوە و دەستی بە گەڕان كردووە بەدوای دوو كەس دا كە گومانی كردووە ئەوان هێرشەكەیان ئەنجامدابێت، لەئەنجامدا كەسێك لەسەر پلیكانەكانی ئۆپرای باستیل دەستگیركراوە.

تائێستا پۆلیسی فەرەنسا بەردەوامە لە لێكۆڵینەوە و دڵنیا نییە هێرشەكە تیرۆریستی بووە یاخود پاڵنەری كەسی هەبووە.

گۆڤاری شارلی هیبدۆ لە ساڵی 2015 لەلایەن چەند توندڕەوێكەوە هێرشیكرایەسەر و بەهۆیەوە 12 كەس كوژران و 11 ی دیكەش برینداربوون، ئەویش دوابەدوای بڵاوكردنەوەی چەند وێنەیەكی كاریكاتێری لەلایەن ئەو گۆڤارەوە لەسەر پێغەمبەری ئیسلام.