مەودا میدیا- سازگار ئەحمەد

نیوەڕۆی ئەمڕۆ لە رێگای قەزای کەلار-باوەنور نزیک گوندی تازەدێ لە رووداوێکی هاتووچۆدا کەسێک گیانی لەدەستدا و شەش کەسی دیکەش بریندارە.

رائید کارزان مەجید، وتەبێژی هاتووچۆی گەرمیان بە مەودا میدیای راگەیاند "نیوەڕۆی ئەمڕۆ لە رێگەی  کەلار-باوەنور لە نزیک گوندی تازەدێ ئۆتۆبێلێکی جۆری بی ئێم وەرگەڕاوە و کەسێک گیانی لەدەستدا کە شۆفێری ئۆتۆمبێلەکەیە و شەش کەسی دیکەش بە سەختی برینداربوو".

وتەبێژی هاتووچۆی گەرمیان ئاماژەی بەوەشکرد "لێکۆڵینەوە لە هۆکاری روودانی رووداوەکە لەلایەن تیمەکانی هاتووچۆوە دەستیپێکردووە".

بەپێی زانیارییەکان، ئەو کەسەی گیانی لەدەستداوە ناوی "بیلال نامیق"ە و لەدایکبووی ساڵی 1997 و دانیشتووی قەزای کەلارە، شۆفێری ئۆتۆمبێلەکە بووە.