مەودا میدیا-

 رێكخراوى فەلەكناسى كوردستان رایدەگەیەنێت چاوەڕوان دەکرێت سبەی هەینی دياردەيەكى گەردوونى رووبدات لە بەشێكى جيهان كە (مانگ گيرانى نيمچە سێبەر - Penumbral Lunar )ە و لەهەرێمى كوردستانيش دەتوانريت بە چاوى ئاسايى بەدى دەكرێت.

ئەمڕۆ  رێكخراوى فەلەكناسى كوردستان بڵاویکردەوە و رایگەیاند "بەپێى داتا و ئەژمارە ووردە فەلەكيەكان چاوەروان دەكرێت لە شەوى هەينى 5/6/2020 دياردەيەكى گەردوونى ڕووبدات لە بەشێكى جيهان كە ( مانگ گيرانى نيمچە سێبەر - Penumbral Lunar  ) ە و لەهەرێمى كوردستانيش دەتوانريت بە چاوى ئاسايى بەدى دەكرێت".

ئاماژەی بەوەشکردووە "ئەم مانگ گيرانە لە هەريەكە لە وولاتانى ئەوروپا و ئاسيا و ئوستراليا و ئەفريقا و باشورى ئەمريكا و زەرياى هيندى و هێمن دەگرێتەوە، هەروەها  لە هەرێمى كوردستان و عيراقيش بەدى دەكرێت لە  كاتژمێر 8:45 شەو مانگ گيران دەست پێدەكات و كاتژمێر 11:25 شەو مانگ گيران دەگاتە بەرزترين ئاست و  كاتژمێر 1:04 بەيانى مانگ گيران كۆتايى دێت".

باس لەوەشکراوە "مانگ گيرانى نيمچە سێبەر ( نيمچە تاريك ) ئەو كاتە ڕوودەدات كە مانگ دەچێتە نێو شوێنگەيەك كە بێى دەوترێت ناوچەى نيمچە سێبەر واتە سێبەرى زەوى بە تەواوى ناكەوێتە سەر مانگ و بۆيە مانگ گيرانەكە بە تەواوى بەديارناكەوێت وەك رەنگ سور بوون،  تەنها وەك رەنگ تاريكيەك بەسەر بەشێكى مانگ دياردەبێت".