مەودا میدیا-

بەڕێوەبەریی ئاسایشی ناحیەی کۆکز رایگەیاند، کاتژمێر 12:30ی خولەکی شەوی رابردوو چەکدارانی داعش هێرشیان کردووەتەسەر بازگەی حەلوان لەباکوری ناحیەی جەلەولا، بەو هۆیەشەوە چوار سەرباز کوژران و پێنجی دیکەش برینداربوون.

بەرەبەیانی ئەمڕۆ شەممە چەکدارانی داعش هێرشیانکردووەتە سەر بازگەیەکی سوپای عیراق و ژمارەیەک کوژراو و برینداری لێکەوتەووە لەو بارەیەوە شەماڵ عەبدولرەحمان، بەڕێوەبەریی ئاسایشی ناحیەی کۆکز بە مەودا میدیای راگەیاند، سەرەتا چەکدارەکان لە کاتژمێر 12:30 خولەکی شەو هێرشیانکردووەتە سەر بازگەکە و بەوهۆیەشەوە سەربازێکی سوپای عیراق کوژراوەو و سێ سەربازی دیکەش برینداربوون.

ئەوەشی روونکردەوە، کاتێک کە ئۆتۆمبێلی فریاکەوتنی تەندروستی گەیشتووتە شوێنی هێرشەکە بۆ بەدەمەوەچون و گواستنەوەی کوژراو و بریندارەکان جارێکی دیکە چەکدارانی داعش هێرشیانکردووەتەوە و لە ئەنجامدا سێ سەربازی دیکە کوژراون و دوو سەربازیش برینداربوون، وتیشی، لە ئەنجامی هەردوو هێرشەکە چوار سەرباز کوژراون و پێنجی دیکەش برینداربوون.

هاوکات شەماڵ عەبدولرەحمان ئاماژەی بۆ ئەوەکرد، بازگەکە سەربازانی فەوجی چواری سەر بە لیوای یەکی سوپای عیراقی تێدایە و سەرباری زیانە گیانییەکان، ئۆتۆمبێلێکی فریاکەوتن و هەمەرێکی سەربازی سوتاوە.

ر. ر